சென்னை: வாக்காளர் பட்டியலில் பெயர் சேர்க்க, வரும் 20ம் தேதி கடைசி நாள் என்று தமிழக தலைமை தேர்தல் அதிகாரி பிரவீன்குமார் கூறினார். வரும் 2013ம் ஆண்டு ஜனவரி 1ம் தேதியை அடிப்படையாக கொண்டு, வரைவு வாக்காளர் பட்டியல் தயாரிக்கும் பணி முழுவீச்சில் நடந்து வருகிறது. வரைவு வாக்காளர் பட்டியல் கடந்த அக்டோபர் 1ம் தேதி வெளியிடப்பட்டு அந்தந்த மாநகராட்சி மண்டல அலுவலகம், அங்கீகரிக்கப்பட்ட வாக்கு சாவடி மையம், வருவாய் கோட்டாட்சியர் அலுவலகம், நகராட்சி ஆணையர் அலுவலகம் மற்றும் தாசில்தார் அலுவலகங்களில் பொதுமக்கள் பார்வைக்கு வைக்கப்பட்டுள்ளது. பெயர் சேர்த்தல், நீக்கம், திருத்தம், இடமாற்றம் செய்வதற்கான படிவங்கள் அங்கேயே வழங்கப்பட்டன. இதனால், பெரும்பாலானவர்கள் அங்கேயே படிவங்களை பூர்த்தி செய்து வழங்கி வருகின்றனர்.
